ჩვენი კომისიის საქმიანობა არ ემსახურება მამუკა ხაზარაძის დისკრედიტაციას, ის უკვე არის დისკრედიტირებული, ვინაიდან როგორც აქ მოსმენილი ფაქტებით ირკვევა, ხაზარაძე და „თიბისი ბანკი“ „ნაციონალური მოძრაობის“ ხელისუფლების დროს იყვნენ გარკვეული ტიპის ხელის ბიჭები, რომლებიც „თიბისი ბანკს“ აყენებინებდნენ სააკაშვილს, კეზერაშვილს და სხვებს, რათა მშრომელი ადამიანების საკუთრების უფლება შელახულიყო, – ამის შესახებ „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ ხელმძღვანელმა, თეა წულუკიანმა კომისიის სხდომაზე განაცხადა.

წულუკიანის თქმით, მამუკა ხაზარაძე რადგან არ გამოცხადდა საგამოძიებო კომისიაში, უნდა დაანებოს თავი ამ კომისიას და მიხედოს სასამართლო პროცესს.

„გუშინ ვნახეთ, რომ მამუკა ხაზარაძე იყო წარდგენილი სასამართლოს წინაშე, ბრალდებულის სახით. მას დღეს აქვს ბრალდებულის სტატუსი და მოსამართლემ გადაწყვიტა, ბატონი მამუკა თავისი გასამართლების პროცესს უნდა დაელოდოს შინ, მაგრამ უნდა გადაიხადოს ამისთვის 50 000 ლარის ოდენობის  გირაო. ეს არ არის არც განაჩენი და არც გასამართლება, მარტივ ენაზე ვამბობ, სასამართლო პროცესები წინ არის და ჩვენ აპრილი-მაისის თვის განმავლობაში, როგორც ამას ითვალისწინებს კანონით დადგენილი ვადები, შევიტყობთ, რა იქნება განაჩენი, რომელიც მასთან დაკავშირებით გამოვა. მანამდე დაახლოებით ორთვიანი პროცესია წინ და ამას ყველა ყურადღებით დავაკვირდებით. მინდა, ვისარგებლო შემთხვევით და მას ვუპასუხო, როდესაც კომისიას ბრალი დასდო, თითქოს ჩვენი საქმიანობა ემსახურება მის დისკრედიტაციას. ჩვენი კომისიის საქმიანობა არ ემსახურება  ბატონი მამუკა ხაზარაძის დისკრედიტაციას, იმ მარტივი მიზეზის გამო, რომ ის უკვე არის დისკრედიტირებული, ვინაიდან როგორც აქ მოსმენილი ფაქტებით ირკვევა, ბატონი მამუკა და „თიბისი ბანკი“ მაშინ, „ნაციონალური მოძრაობის“ ხელისუფლების დროს იყვნენ რეალურად გარკვეული ტიპის ხელის ბიჭები, რომლებიც თავს აყენებინებდნენ და „თიბისი ბანკს“ აყენებინებდნენ მიხეილ სააკაშვილს, დავით კეზერაშვილს და სხვებს იმისთვის, რომ მშრომელი ადამიანების საკუთრების უფლება შელახულიყო. არც იმას ერიდებოდა მაშინ ბატონი მამუკა და როგორც ჩანს, არც ბატონი  ბადრის სინდისი არ ქენჯნიდა, როდესაც ეს ადამიანები გაუძალიანდებოდნენ სისტემას, ისინი ხვდებოდნენ საპატიმროში, მათ აწამებდნენ და ეპყრობოდნენ არაადამიანურად. ეს არის მამუკა ხაზარაძის მთელი ავან-ჩავანი და ანი და ჰოე. ახლა მას აქვს ბრალდებულის სტატუსი. ამიტომ კომისიაში რაკი არ გამოცხადდა, დაანებოს ამ კომისიას თავი და მიხედოს სასამართლოს, სასამართლო პროცესს და პროკურორს ელაპარაკოს“, – განაცხადა თეა წულუკიანმა.