მედიის, ინფორმაციისა და სოციალური კვლევების ცენტრის "ჟურნალისტების უსაფრთხოება საქართველოში - ინციდენტები" კვლევის ფარგლებში დადგინდა, რომ 2024 წლის 28 ნოემბრიდან დღემდე, პროევროპულ აქციებზე მედიის წარმომადგენლების უფლებების დარღვევის 147 შემთხვევა დაფიქსირდა.

"თბილისსა და საქართველოს სხვა ქალაქებში მიმდინარე საპროტესტო აქციების გაშუქებისას, ტენდენციის სახე მიიღო ჟურნალისტების, ოპერატორებისა და ფოტოგრაფების მუშაობაში ხელშეშლის, სიტყვიერი და ფიზიკური შეურაცხყოფის, ტექნიკის დაზიანების ან ჩამორთმევის შემთხვევებმა. ბოლო პერიოდში ასევე ტენდენციად იქცა საპროტესტო აქციის გაშუქებისას მედიის წარმომადგენლების დაჯარიმება გზის გადაკეტვის საფუძვლით. დაფიქსრიდა კრიტიკული პოზიციის გამოხატვის გამო ჟურნალისტების შევიწროებისა და სამსახურიდან გაშვების შემთხვევებიც.

მედიის, ინფორმაციისა და სოციალური კვლევების ცენტრმა 2024 წლის 28 ნოემბრიდან დღემდე, პროევროპულ აქციებზე ან/და აქციებთან დაკავშირებულ შემთხვევებში მედიის წარმომადგენლების უფლებების დარღვევის 124 ინციდენტი  აღწერა, რა დროსაც ჯამში 147 ჟურნალისტი, ფოტოგრაფი და ოპერატორი გახდა რეპრესიების სამიზნე. აქედან, 24 რეპორტიორი ერთზე მეტჯერ  დაშავდა და დაუზიანდა ტექნიკა, ან/და დაშავდა ფიზიკურად, დაჯარიმდა ან საქმე აღიძრა მათ წინააღმდეგ. ფინანსური ჯარიმა, 5000 ლარის ოდენობით, სავალი გზის გადაკეტვის საფუძვლით, პოლიციამ 17 ჟურნალისტს გამოუწერა" - ვკითხულობთ CMIS-ის მიერ გამოქვეყნებულ დოკუმენტში.

CMIS-ის განმარტებით საუბარია ინციდენტის შემდეგ ტიპებზე: გადაღების აკრძალვა, გადაცემის წაყვანის უფლების დროებით შეჩერება, დაკავება, მუქარა, სამართლებრივი დევნა, სამსახურიდან გათავისუფლება, ტექნიკის დაზიანება, ტექნიკის ჩამორთმევა, ფიზიკური დაზიანება, ფიზიკური ძალადობა, ფინანსური ჯარიმა, ქონების დაზიანება, წინასწარი პატიმრობა.

ინციდენტის კონტექსტი კი კრიტიკული პოზიციის გამო/პროფესიული ნიშნით დევნა და პროფესიულ მოვალეობაში ხელის შეშლაა.

ცნობისთვის, კვლევის ფარგლებში გამოვლენილი ერთ-ერთი ინციდენტი ტაბულას ჟურნალისტის, ბექა ჯიქურაშვილის დაჯარიმებაა - მას 2025 წლის 14 თებერვალს, პროფესიული მოვალეობის შესრულების დროს გზის გადაკეტვას ედავებიან. აღსანიშნავია, რომ ჯიქურაშვილს პრესის ბარათი ეკეთა და პროფესიულ მოვალეობას ასრულებდა.  ჯარიმა გასაჩივრებულია.