2025 წლის პირველ 7 თვეში საქართველოს ადგილობრივი ექსპორტი წლიურად 2.7%-ით 1 მილიარდ 742 მილიონ დოლარამდე გაიზარდა. საქსტატის მიერ დღეს გამოქვეყნებული მონაცემებით, მხოლოდ ივლისში ადგილობრივ ექსპორტში კლება იყო და ქვეყანაში წარმოებული საქონლის გაყიდვები 13.8%-ით, 269.2 მლნ დოლარამდე შემცირდა.

საქართველოს საგარეო ვაჭრობის 7 თვის ოფიციალური სტატისტიკის მიხედვით, იანვარ-ივლისში საქართველოდან განხორციელებული საქონლის ექსპორტის მოცულობამ 3 მილიარდ 845 მილიონ დოლარი შეადგინა, რაც 9%-ით მეტია გასული წლის შესაბამისი პერიოდის მაჩვენებელზე.

ადგილობრივი ექსპორტი, რაც ექსპორტს რეექსპორტის გარეშე მოიცავს, მთლიანი ექსპორტის 45.3%-ს შეადგენს.

იანვარ-ივლისში 10 უმსხვილესი ქვეყნის წილმა საქართველოს მთლიან ადგილობრივ ექსპორტში 70.8% შეადგინა. ამ რეიტინგში კლება მხოლოდ თურქეთის, სომხეთის და უკრაინის მიმართულებით დაფიქსირდა.

2025 წლის იანვარ-ივლისში ადგილობრივი ექსპორტის ათეულში პირველ ადგილზე ძვირფასი ლითონების მადნები და კონცენტრატები არის წარმოდგენილი. უნდა აღინიშნოს, რომ იანვარ-ივლისში საქართველოში წარმოებული პროდუქტის პირველ ათეულში შემცირებულია ღვინის, სპირტიანი სასმელების, ფეროშენადნობებისა და ტრიკოტაჟის ნაწარმის გაყიდვები.